சமூகம் தந்த வைரஸ் ; மாறிப்போன மனம் என்னும் மென்பொருள்!

cognitive therapy in Practice. எண்ணவழிச்சிகிச்சை ஒரு செயன்முறை உதாரணம்:

ஒரு சம்பவம் ;ஒரு சிந்தனை; ஒரு உணர்வு:

அந்தப்பெண் சிரிக்கவில்லை.

‘’ உங்களுக்கு என்ன செய்யவேண்டும்’’ தொனி விறைப்பாக இருந்தது. அவள் முகத்தில் சிரிப்புக்கூட இல்லை.முகம் இறுகிப்போய் இருந்தது.

வழமையாக இங்கு அனேகர் மிகவும் குழைவாகப்பேசுவார்கள்.வாடிக்கையாளரை மரியாதையாகவும் அதேன்நேரம் ஒரு நட்புத்தொனியோடு அளவளாவுவதுபோல ‘எப்படி நாள் இன்றைக்கு ?’’ என்று ஒரு கேள்வியோடு தொடங்கும்.

ஒரு வேலை முடிந்து வெளியில் வருகிறபோது எங்கள் தேவையை ஒரு உரிமையோடு செய்து விட்டு வருவதான உணர்வு வரும்.

அவளுடைய இறுக்கம் எனக்கும் தொற்றிக்கொண்டது.உள்ளே எழுந்த அசௌகரியத்தோடு நானும் விபரங்களை சொன்னேன்.

வெளியில் வந்தபோது மனம் சோர்ந்துபோய் இருந்தது.ஒரு புறக்கணிக்கப்பட்ட உணர்வு.

அன்னியமான உணர்வு.

தோன்றும் எண்ணங்கள்-Automatic Thoughts:

    இந்தவெள்ளைக்காரப்பெண் ஏன் இப்படி நடந்து கொண்டது?

    இப்படி கேள்வி எழுவது நியாயமானதே. இப்படி கேள்வி எழும்போது அதற்கு மனதில் ஒரு பதிலும்  தோன்றிவிடுமே. அவற்றைத்தான்  தோன்றும் எண்ணங்கள் –Automatic thoughts என்போமே.

‘’என்ன செய்வது எங்கள் தோலின் நிறம் அப்படி’’ இப்படித்தான் சட்டென்று தோன்றியது.அந்தப்பெண் நிறவெறி பிடித்தவளோ?

   இப்படி ஒரு சம்பவமும் ஏற்படும் மன உளைச்சலும் எமக்குப்புதிதல்ல. இனம் சாதி ,தோலின் நிறம் ஊடாக மனிதனைப்பார்க்கிற பெரும்பான்மையோர் வசிக்கிற உலகம் என்று சொன்னால் அது மிகையாகிப்போய்விடாது.

 மேற்படி சம்பவம் ஒரு மிகச்சிறிய ஒரு சாதாரண சம்பவம். சிறிய ஒரு மன வேறுபாடு.

 உலகம் எங்கும் இருக்கிற புறக்கணிக்கப்படுகிற ,தாழ்த்தப்படுகிற மக்கள் அனேகர் இப்படி வெளிப்படையாகத்தெரியாத ஒரு புறக்கணிப்பை அது இருந்தாலும் இல்லாவிட்டாலும் உணர்பவர்களாகத்தான்  இருக்கிறார்கள்.

 ஏன்?

மேற்படி சம்பவத்தை என்னை ஒரு எண்ணவழிமுறையில் ஆராய்வோம்.

 ‘’ உமது மனம் சோர்வடைந்ததா?’’

ஆம்

‘’என்ன காரணம்’’

‘’ அந்தப்பெண் சிரிக்கவில்லை. வழமையாக இருக்கும் குழைவான பேச்சில்லை’’

‘’ ஒருவர் உம்மோடு சிரித்து சந்தோஷமாகக் கதைக்கவில்லை என்றால் ஏன் அது உங்களைக் கவலைப்படுத்துகிறது’?

‘’ ம்ம்ம்…நான் நினைக்கிறேன்.. அப்படி அவர்கள் கதைக்கவில்லை யென்றால்  அவர்களுக்கு என்னைப்பிடிக்கவில்லை என்று உணர்கிறேன்.’’

‘’உங்களுக்குப்பிடித்தவரிடம் மாத்திரமா நீங்கள் சிரித்துப்பேசுவீர்கள்?’’

‘’ அப்படி என்றில்லை.புன்முறுவலோடு சிரித்துப்பேசவேண்டியது தொழில் முறையில் தேவையாயிருக்கிறது.பிடித்ததோ பிடிக்கவில்லையோ சிலவேளைகளில் பேசத்தான் வேண்டியிருக்கிறது’’

‘’நீங்கள் சிரித்துப்பேசாத சந்தர்ப்பமும் இருக்கிறதா

‘’ நான் உள்ளூர கவலையாயிருக்கிற சந்தர்ப்பத்தில் சிரித்துப்பேச முடிவதில்லை’’

’’அந்தப்பெண் உள்ளூரக்கவலையாயிருந்திருப்பாளா?’’

’’ இருந்திருக்கலாம்.’’

Cognitive Distortion-எண்ணவழு:

இந்த இடத்தில் முதலாவது தவறு பிடிபட்டுவிடுகிறது

ஆக இந்த இடத்தில் எனக்கு ஏற்பட்ட சிந்தனை வழு –மனமறிதல் தன்னிலைப்படுத்தல் போன்றது.

நான் அவளுடைய முகவாட்டத்துக்கு நான் காரணம் என்று நினைத்து விட்டேன் Personalization.அடுத்தது அவள் நிறத்தைப்பார்த்து எடை போடுபவள் என்று நினைத்து விட்டேன்.-Mind Reading,

 vertical descent- மனதினுள் இறங்குதல்:

கேள்விகள் இன்னும் முடியவில்லை. இப்படி சட்டென்று நிறவெறி வகைக்கும் நான் போவதற்கான காரணம் என்ன?

  ஒக்கே அவள் உங்களைப்பார்த்து சிரிக்காததால் அவளுங்களை வெறுப்பதாகத்தோன்றி விட்டது.’’

‘’ ஏன் அப்படி அவள் உங்களை வெறுக்கவேண்டும் ஒரு முன்பின் தெரியாத மனிதரை?

‘’ அதைத்தான் நான் யோசித்துப்பார்த்தேன். ஓரே காரணம் என் தோலின் நிறம்’’

‘’ ஏன் தோலின் நிறம் என்ன சிக்கல்’’

‘’என் தோல் கறுப்பு’’

‘கருப்பு வெளுப்பு என்ன வேறுபாடு ?’

கருப்புத்தோல் தாழ்வானது வெறுப்பை ஏற்படுத்துவது’’

‘’ஏன் அப்படிச்சொல்கிறீர்கள்?’’

‘’அந்த அபிப்பிராயம் வெள்ளைக்காரருக்கு இருக்கிறது’’

‘’சரி இந்த இடத்தில் நீங்களும் அந்த வெள்ளையினப் பெண்மணிக்கு மிடையிலான ஒரு சில கணங்கள் அவை. அந்த ஒரு சில வினாடிகளில் ஒரு பொதுவான அபிப்பிராயத்தைக்கொண்டு வந்து அங்கே பொருத்தியிருக்கிறீர்கள். ’’வெள்ளைத்தோலுள்ளவரைச்சந்திக்கும்போது நீங்கள் கறுப்பு என்ற உணர்வு –பிரக்ஞை உங்களுக்குள் வந்து விடுமா?’’

‘’அப்படித்தான் நினைக்கிறேன்’’

‘’ஏன் அப்படி வருகிறது’’

‘’அவர்கள் என்னைத்தாழ்வாக நினைக்கிறார்களோ என் தோலை வைத்து என்னை மதிப்பிடுவார்களோ என்ற எண்ணம்’’

‘’அதாவது உங்கள் நிறம் தாழ்வானது என்ற ஆழமான பதிவு உங்களில் இருக்கிறது’’

‘’ அப்படி ஒரு எண்ணம் ஏற்படுத்தப்பட்டது என்று நினைக்கிறேன்’’

இப்படி வினாக்களைத்தொடுத்துகொண்டு போனால் ஒரு இடத்தில் அது தரை தட்டிவிடும். இந்த முறையை vertical descent என்பார்கள். மனத்தினுள் இறங்குதல் என்றும் சொல்லலாம்.

  இந்த முறை ஒருவரின் உள்ளக்கட்டமைப்பை schema அறிய உதவும். விளக்கிச்சொன்னால் வாழ்க்கை , வளர்ப்பு அனுபவங்களிலிருந்து எங்களுக்குள் எங்களைப்பற்றிய ஒரு பிம்பம் அல்லது பிரக்ஞை உருவாகியிருக்கும். இந்தப்பிரக்ஞை தான் சம்பவங்கள் பற்றிய புரிந்துணர்வைத்தறுகிறது.

 Schema-என்னைப்பற்றிய பிம்பம்/உள்ளக்கட்டமைப்பு:

 மேற்படி சம்பவத்திலுள்ள ‘’நான்”” இனுடைய பிரக்ஞை இரண்டு தன்மையைக்கொண்டிருக்கிறது.

ஒன்று அங்கீகாரத்தை எப்போதும் எதிர்பார்க்கும் தன்மை. அதனால்தான் அந்தப்பெண்ணின் சிரிக்காத தன்மை மனதில் இவ்வளவு தாக்கத்தை ஏற்படுத்தியது. பலர் சிரிக்காததை பொருட்படுத்துவதேயில்லை.

இரண்டாவது தோலின் நிறம் தாழ்வான ஒன்று அதனால் தான் தாழ்ந்தவன் என்ற நினைப்பு.

இது வாழ்க்கையின் பல அனுபவங்களிலிருந்து உருவானது.

  

இனம்,சாதி,தோலின் நிறம் என்பவை மனித மனங்களுக்குள் இந்த தாழ்வான பிம்பத்தை உருவாக்கிவிடுகின்றன.

    

சமுகம் உருவாக்கிய வைரஸ்.மாறிப்போன மனமென்னும் மென்பொருள்

சாதிய உணர்வு என்பது மனித மனதில் இரு துருவங்களை உருவாக்கிவிடுகிறது. நாங்கள் உயர்ந்தவர்கள் என்ற பிரக்ஞை உடையவர்களும் நாங்கள் தாழ்ந்தவர்கள் என்ற மனப்பிம்பம் உடையவர்களையும் உருவாக்கிவிட்டிருக்கிறது.

 சாதியத்துக்கு எதிரான முன்னெடுப்புக்கள் இன்னொருவகை நாங்கள் தாழ்த்தப்பட்டவர்கள் என்ற இன்னொரு மனப்பாங்கை உருவாக்கியிருக்கின்றன.

தாழ்ந்த நினைப்பு சோகத்தையும் சோர்வையும்,தாழ்த்தப்பட்ட நினைப்பு கோபத்தையும் விரக்தியையும், உயர்ந்தவன் என்கிற நினைப்பு இரண்டு விதத்தில் வெளிப்படலாம்.

ஒன்று ஒதுக்குதல்,எள்ளல் மனப்பான்மை அது வெளிப்படையானது.

மற்றது பெருந்தன்மை.இவர்கள் மனதுக்குள் நான் பெரிய சாதிக்கரான் தாழ்ந்தசாதிக்காரனை சமமாக நடத்துகிறேன் என்று நினத்துக்கொள்வார்கள்.

  இப்படி விதமான மனப்பிம்பங்களை உருவாக்குகின்ற ஒரு சமூகம் முள்ளில் விழுந்த சேலை ஆக இருக்கிறது.

 சமுகங்களுக்கு இடையில் பிளவை அதிகரிக்காமல் இந்த மனப்பாங்கை மாற்றுவதற்கு உண்மையில் வேண்டியது குழுச்சிந்தனையில் இருந்து தனிமனிதனை மையப்படுத்திய சிந்தனை வரவேண்டும், அதாவது ஆட்சியதிகாரம், சட்டம் தனி மனித உரிமையை மிக வலுவாகப்பாதுகாக்கவேண்டும்.

  உளவியல் தனிமனிதனின் சிந்தனையை விரிவாக்க செம்மைப்படுத்த முயல்கிறது.

 ஒவ்வொருவரும் தங்கள் பிரக்ஞையை அலச வேண்டும். ஓ ஆழ்மனத்தில் நான் என்னை உயர்ந்தவனாக நினைக்கிறேன்…(வெளியில் அனைவரும் சமம் என்று பேசித்திரிந்தாலும்)……

என்னைத்தாழ்ந்தவனாக நினைக்கிறேன்      அதனால் என் பார்வை திரிபு படுத்தப்பட்டதாக இருக்கிறதென்பதை உணரவேண்டும்.

  மனிதர்கள் அனைவரும் சமம் என்கிறஉணர்வு (மனித உரிமைப்பிரகடனத்தை)  பிரக்ஞையாகும் பொழுதுதான் சாதி என்கிற பிரக்ஞை இலிருந்து விடுபடமுடியும்.

சம்பவத்தின் உண்மை முகம்:

 அடுத்த நாள் அதே இடத்துக்குப்போனேன். அந்த வெள்ளைத்தோல் பெண்மணிதான் அங்கேயிருந்தாள். நேற்றுப்போலவே இன்றைக்கும் அவள் விறைப்பாக இருந்தாள்.

  ‘’ என்ன வேலைப்பளு அதிகமா?’’

‘’ வழமையாகச்சிரித்தபடி இருப்பீர்கள்.’’

‘’ ஸ்ஸ் ஓ முகத்தில் தெரிகிறதா சொறி.மனசு கொஞ்சம் சரியில்லை’. இரண்டு மூன்று நாட்களாக கொஞ்சம் கஷ்டந்தான். என் கணவர் மருத்துவமனையில் இருக்கிறார்.’’

 அவள் இறுக்கந்தளர்ந்து பெருமூச்சுவிட்டபடி சொன்னாள்.

  ’’தாங்ஸ்’’

மீண்டும் மீண்டும் நன்றி சொன்னாள்.

மேற்படி சம்பவம் கற்பனைதான்.

மேலதிகாரி திட்டினால் திட்டு வாங்கிவிட்டு சிரித்தபடி வருவார்கள்.

‘’ என்ன கடுமையான டோஸோ’’

‘’என்ன இண்டைக்கு மனுஷன் மனுஷியிட்டை செமையாய் வாங்கிக்கட்டியிருக்கும் போல அதுதான் இஞ்சை பாயுது பாவம்‘’ சொல்லிவிட்டு இயல்பாய் இருப்பவர்கள் இருக்கிறார்கள்.

எல்லாமே பார்வைதான் அந்தப்பார்வைக்குக்காரணம்  பிம்பம்..

SCHEMA ! .